منة عيد حسن من مواليد محافظة القاهرة، فتاة تبلغ من العُمر ثمانية عشر عامًا، وبالبرغم من صغر سنها إلا أنها شخصيه صاحبة قرار، تعرف جيدًا ماذا تفعل وماذا تُريد، قررت ان ترسم البسمة على وجوه البشر، فربما شيء بسيطًا يُعيد الفرحه على وجوههم
*************************
اسمك: منه عيد حسن
سنك: 18
المحافظة: القاهره
بدأتِ أمتى: بدأته من اول شهر 12 والغريبه حقيقي اني لقيته بيزيد جدا والفكره انتشرت بسرعه دي حاجه انا متوقعتهاش خالص ولقيت ناس بتكلمني كتير جدا عشان يبعتوا رسايلهم ويبعتوا هدايا واستغربت كمان من فكرة ان ناس كتير كانوا بيبعتوا فلوس للهدايا اللي عاوزين يودوها للناس وهما مطمنين انها هتوصل مع انه مكنش لسه جروب مشهور ولا حاجه ودي حاجه حقيقي كانت مفرحاني جدا وشجعتني اني اكمل
جتلك الفكرة ازاى: حقيقي جت فجأه لأن من ضمن الحاجات اللي مش بنعرف نعبر عنها هي مشاعرنا وبنخاف جدا من الفكره نفسها ان نقول لحد اللي حاسين بيه من ناحيتهم وبنخاف جدا حتي نصارح نفسنا بمشاعرنا ففكرة الجروب انه بيساعدك انك توصل مشاعرك وكلامك اللي انتي دافنه جواك دا وتوصله وعلي الاقل مش هتندم قدام لانك عملت اللي عليك وقلت اللي جواك ومترددتش مهما كانت النتيجه حقيقي وهي دي الثغره بتاعت السوشيال ميديا انك علي الاقل هتعرف ان فيه شخص بيحبك ومتهم لوجودك في الدنيا دي انك مش عايش وخلاص وفي ناس مهتمين بيك وبيراقبوك من بعيد لبعيد عشان يطمنوا عليك وفكرة الهدايا انا مكنتش عملاها انا بدأت اعملها لما فكرت وشوفت قد ايه فعلا ناس بتبقا محتاجه حاجه تفرحها ف وسط ضغوطات كتير ف قررت اني ابدأ اوزع الهدايا بشكل عشوائي وكمان لقيت ناس كتير ساهمت حقيقي ف ان هي كمان تبعت هدايا للناس معايا وهما حابين حاجه زي كدا وحقيقي جبر الخواطر عند ربنا كبير وكمان بلاقي ناس بتدخل تشجع بتوع ثانويه عامه يكتبلهم مستچات تساعدهم يكملوا ويستحملوا شويه وببيبعتولهم هدايا علي امل انه يفرحهم بس شويه ويساعدوهم يكملوا
حابة الفكرة دي، و لي؟ : اكيد حباها جدا لأن فعلا 99% من الناس مبيعرفوش يعبروا عن اللي جواهم انا لقيت دي فرصه انك تقول اللي جواك كله بشكل Secret عشان ناس كتير بتبقي خايفه دايما من ردة الفعل او انهم يترفضوا ف فضلت اني اخلي الموضوع كله Secret عشان الناس تبقا مرتاحه ومطمنه اكتر واللي بيطلب بعد كدا انه يتعرف بنعرف الشخص دا مين اللي بعتله الهديه او المستچ دي
ردود أفعال الناس اى ناحية الفكرة: حقيقي استغربت بردوا ان ناس كتير دعمت الفكره من اول بوست نزل علي الجروب وناس كتير كانت بتشكرني حقيقي علي فكرة الجروب لأنه من الناس اللي بعتت دي بعد ما كانوا ما بيتكلموش وبعدوا رجعو تاني يتكلموا واتصالحوا وهما مبسوطين ان محدش فيهم نسي التاني وقرر يسامحه ويرجعله وحقيقي فرحت جدا بحاجه زي دي وزي ما لقيت اكيد اللي شجعوا لقيت ناس كتير بتحبط ودول من حظي كانوا الاقل وبتقولي ان دا حرام انتي كدا بتشجعي ان الولد يكلم البنت ودي حاجه حرام شرعا ف حقيقي انا مبعملش كدا فعلا الناس دي كانت المستچ اللي كانت هتبعتها او الهديه بتبقا جاهزه وعايزين يبعتوها لكن مش عارفين يبعتوها ازاى وانا اكيد مش خديجه المغربيه لجلب الحبيب وتقشير الزبيب انا حقيقي ببقا واخده بالي وعمري ابدا ما هقرر انشر فكره وحشه للناس الموضوع كله ف انك بتحاول تعبر عن اللي جواك او تجبر بخاطر شخص او تعاتب حد مقدرتش انك تعاتبه بس مش اكتر
مين دعمِك على الفكرة دي: ماما حقيقي كانت اول شخص يشجعني علي حاجه زي دي هي حقيقي الداعم الكبير ليا بجد واكتر شخص Supporter في حياتي ومن بعدها اخواتي وصحابي والادمن التانيين اللي معايا وحقيقي مترددوش ثانيه انهم يشجعوني اني اكمل الحاجه اللي بدأتها لاني فكرت الغيه بسبب انه عملته ف وقت امتحانات وانا متوقعتش انه هيكبر ويتعرف بالسرعه ف كملت وحقيقي مش هوقف ابدا حاجه زي دي لاني شوفت فرحة الناس حقيقي بجد عن طريقه
هل مبسوطة بنجاح فكرتِك: مبسوطه جدا فعلا ان الفكره نجحت وبيزيد كل يوم بسكل مستمر الحمدلله ومبسوطه اكتر بالناس اللي حبت الفكره وكل يوم بلاقي رسايل كتير بتدعم فكرة الجروب انه يكمل
نفسك توصلى لأى في الفكرة دي: نفسي حقيقي كل انسان يفهم انه لازم يقول اللي جواه وميخبيش وعشان كدا عملت الجروب دا وانه يتكلم مهما كانت النتيجه او ردة الفعل الندم علي شئ انت معملتوش ومحاولتش فيه اصعب بكتير من انك تندم انك قلت ف حقيقي قولوا اللي جواكوا وانتو مستريحين لأن عالاقل هتبقوا حاولتوا تعبروا عن اللي موجود جواكوا ومتجاهلتوش مشاعركوا
استفدتي اى من تجربتِك: اي حاجه جديده حقيقي ف حياة اي حد بيتعلم منها كتير انا اتعاملت مع شركات وشحن ومندوبين ووانا ف وسط دراسه وبدرس برمجه كمان حاجه ملهاش علاقه بفكرة الجروب خالص وحقيقي من ضمن احلامي اني اكون مبرمجه كويسه ف يوم من الايام وعملت كل دا وانا لسه متمتش 18سنه وبحاول حقيقي اني اعمل اللي عليا ومخليش اي ضغوط تأثر علي حاجه زي دي واتعلمت حقيقي انه مش ضرورى انك تكون معاك فلوس عشان تبدأ فكره حبيتها انا مصرفتش جنيه حقيقي علي ترويج اي بوست نزل عندي مع ذلك حقيقي ربنا وفقني والجروب كبر وعرفت ان زي ما هتلاقي اللي يشجعك هتلاقي اللي يطفي شغفك ناحية حاجه انت مستنيها وحقيقي انا بنصح اي حد بدأ فكره حاجه بيحبها يكملها وهيشوف النتيجه اللي تخليه مرضي حقيقي وراضى جدا عن نفسه
وفي النهاية، ايه تقييمك لنفسك: حقيقي راضيه جدا عن مجهودي ومجهود باقي الادمن اللي معايا اللي دايما كانوا بيساعدوني حقيقي ف ان الجروب يكبر ويكمل وسط امتحاناتنا كلنا وضغوطات وشغل وبشكر اي حد كان حقيقي كان موجود وشجعني اني اكمل وبشكر اي شخص قرر انه يقول اللي جواه وميخبيش
_جريدة كُتاب إيلاف_
