كتفي الثابت الذي لا يميل
"قصة قصيرة"
-كتبتها على الفيسبوك ومن غير ما أعمل منشن، أصل هي عارفه نفسها أكيد وعارفه إن الكلام عليها-
صحيت الصبح على الساعة 8 من مكالمة منها بتقول:
- صباح الخير يا حياة
- صباح الورد عليكي يا ميرال
- أخبارك ايه النهارده؟
- تمام يا ميرو
- يلا قومي نلبس عشان نلحق المحاضرة الأولى
- تمام، هلبس وأكلمك
- متتأخريش
- عيب عليكي هو أنا عمري اتاخرت!
- لا خالص، أنت عمرك ما جيتي في ميعادك أبدًا
- خلاص مش هتأخر، باي
- باي
"نزلنا الجامعة وحضرنا كل المحاضرات، وطلعنا نتمشى، قعدنا على البحر- أكتر مكان مفضل لينا- وفضلنا نتكلم ونغني ونتصور لحد ما روحنا.
فتحت الواتس وكنت مضايقة ومش عارفه من إيه، جريت على الشات بتاعنا علطول، مش بعرف أكلم حد وأنا مضايقة غيرها، محدش بيفهمني من غير ما أتكلم غيرها، فهماني وحفظاني".
- ميرال!
- أيون
- مضايقة وحزينة وزهقانة وعايزه أعيط
- ليه كدا، من ايه! اهدي كدا ومتعيطيش، أنت عارفة إن مفيش حاجة مستاهلة إنك تعيطي عشانها ومش هتستفيدي حاجة غير إن هيجيلك صداع، بس أقولك..قومي نعمل أكل وقهوة الحياة مش مستاهلة يا حياة قلبي
- عندك حق، يلا الأكل أهم دلوقتي بس هنفتح فيديو كول واحنا بنعمل أكل عشان أتعلم منك، أنت عارفه إني فاشلة في موضوع الأكل
- موافقه جدًا، يلا وهعلمك ببلاش اهو يا صحبتي
"بتشاركني في كل حاجة، مشاركاني في تفاصيل يومي كلها، من أول ما بنصحي لحد ما بنام بنعمل كل حاجه سوا، بنختار لبعض كل حاجة، والأهم من دا كله إننا فاهمين بعض كويس.
عملنا الأكل واحنا فاتحين فيديو كول، واتحولت من واحدة كانت مضايقة وعايزة تعيط لواحدة بتضحك وبتغني، أصلها هي الوحيدة اللي بتعرف تطلعني من مود الاكتئاب".
تليفون ميرال بيرن وبتشوف مين لقيت حياة هي اللي بترن..
- ألو ..مفيش حد بيرد
- ألو! حياة أنت سمعاني؟
"صوت عياط"
- حياة مالك حصل ايه؟
"مفيش رد غير صوت عياط"
- حياة أنا جيالك.
"وقفلت"
-وصلت ميرال بيت حياة وأول ما شافتها حياة أترمت في حضنها وفضلت تعيط!
- مالك يا حياة؟
مالت حياة على كتف ميرال وفضلت تعيط وميرال بتطبطب عليها وبتحاول تهدي فيها وتقولها كلام يطمنها لحد ما هديت
"الحقيقة وبدون مبالغة هي وجودها في حياتي بيطمني".
- حياة أنا عارفة إنك مريتي بحاجات كتير وحشة وبمشاكل كتير، بس أنت أقوى من كدا وأنا واثقة إن كل حاجة هتعدي، هتاخد وقتها بس هتعدي وأنا جنبك اهو وهنعدي كل حاجة سوا زي ما بنعدي أي حاجة مع بعض.
"ميرال الوحيدة اللي بقدر أحكيلها أي حاجة، هي الوحيدة اللي عارفة عني كل أسراري وكل الحاجات الوحشة اللي عديت بيها، هي الوحيدة اللي أقدر أعيط قدامها، والوحيدة اللي بقدر أبيِّن ضعفي ليها؛ عشان واثقه إن لو جنبها ضعيفة هي اللي بتقويني".
"وصديقًا كتفه بمثابة جبل، حين أسند عليه أشعر وكأن الحزن لم ينل مني يوماً".
- حياة!
- قلبها
- تعالي نعمل مشروع مع بعض
- موافقة جدًا، يلا أنت شاطرة جدًا في الأكل وأكلك حلو ممكن نعمل بيدج على الفيسبوك وننزل الأكل اللي بتعمليه، وواحدة واحدة نوزع على المحلات والشركات وجيرانك وصحابنا، وأنا واثقة إنك هتنجحي في المشروع وأنا اهو جنبك، بقولك خدي الخطوة ممكن مننجحش من أول مرة، بس هنعافر ومش هنيأس لحد ما توصلي وتنجحي.
"حياة علطول بتشجعني إن أعمل المشروع دا، وإني اخد خطوة، أنا بخاف أفشل بخاف من كلام اللي حواليا، شايفة إن في ناس كتير ناجحة في المشروع دا أكيد مش هيسبوا كل الناس اللي المشهورة والناجحة وهيجوني أنا! بس حياة علطول بتقولي إن اللي نجحوا دول كانوا زينا في الأول بس عافروا ونجحوا، أنا مكنتش عارفة اخد الخطوة دي خالص، بس كلامها المرة دي شجعني جدًا وأبتديت في المشروع، وحقيقي هي وقفت جنبي ومسابتنيش لحظة، ومشروعنا كبر شوية ونجحنا، ومع الوقت بقى عندنا مطعم صغير كدا، وهي ما زالت بتدعمني وبتشجعني في كل خطوة"
"وجودك جنبي شيء مكملني لأن لوحدي مش هقدر."
استمرت علاقتنا ببعض حتى بعد ما تخرجنا وفضلنا ندعم بعض وكبرنا مشروعنا وبدل المطعم بقوا اتنين،
كنا قاعدين على البحر كالعادة، وأنا كالعادة قاعدة ومايلة على كتفها.
- ميرال
- أيون
- بحبك يا صديقي
- وأنا كمان بحبك جدًا يا حياة
- ربنا يباركلي فيكي ويخليكي ليا "أنت صديقي الوفي"
"كيف لا أحبك وأنت الوحيدة اللي بتسعديني في حزني! فوالله أني ما أحببت أحدًا مثلما أحببتك يا صديقتي"
مش كل الناس اللي حواليك ينفع يتقال عليهم صحاب، الصاحب اللي بجد بيبقى جنبك وقت حزنك قبل فرحك، صاحب تقدر تقول عليه سند، تميل عليه يسندك، ميهونش عليه زعلك، يشاركك كل حاجة في حياتك ، يفرح لنجاحك ويدعمك مش يحقد عليك ويكرهك لمجرد إنك نجحت في حياتك، وهو ديبقى معاك خطوة بخطوة.
كلمة "صاحب" مش كلمة وخلاص، لازم تتقال للشخص اللي يستحقها، اللي مهما يحصل بينهم مشاكل بيتعاتبوا و بيرجعوا أقوى من الأول.
"اختر صديق دربك بحكمة"
الصحاب نعمة كبيرة أوي ورزق مش شرط نكون نعرف بعض من سنين مش بتتحسب بالسنين هي بالمواقف، ممكن صاحب سنين يخذلك وصاحب امبارح يسندك، وأنا حظي الحلو من الدنيا كلها أخدته في صحبتي، عدينا بحاجات كتير اوي خناقات كتير لو حد شافها هيقول إننا عمرنا ما هنرجع نتكلم ونبقى صحاب تاني، بس عشان علاقتنا كانت أقوى من أي حاجة، كنا بنتعاتب وبنرجع عشان فاهمين بعض كويس، والأهم من دا كله إننا عمرنا ما حد فينا هان على التاني، ربنا يكرمكم بصاحبة زيها، ادعولنا ربنا يخلينا لبعض ويبعد عننا كل شر ويوفقنا.
إهداء:
"إلى صاحبة عمري ورفيقه دربي وكتفي الثابت اللي عمره ما مال واللي سنداني في كل حاجة ومعايا في كل خطوة..صحبتي آية"
يا صحبة في روحي وفي قلبي مفيش زيك في كل الكون ♥️
بقلم: رشا علي عبد الغني
ربنا يخليكم لبعض وميفرقش بينكم ابدا وتكونوا سند وقوة لبعض
ردحذفاللهم أمين يارب ♥️
ردحذف