متى أُكتشفت موهبَتك، ومن إكتشفها؟
الكتابة بالنسبالي هبة من عند ربنا، يعني جتلي فجأة كدة، وبقالي ٣ سنين بكتب
ما هي طموحاتك القادمة؟
بسعى إني أطور من نفسي في حاجات كتير، وبإذن الله أحقق حلمي إني أعمل عمل فردي ورقي.
هل كان للأُسرة دور في توجهك نحو الفن الأدبي؟
أخويا محمد هو الداعم ليا حقيقي، وبيساعدني كتير.
هل كان هُناك عائقًا في طريقك للنجاح؟ وإن كان هُناك عائق، كيف تخطيتيه؟
العائق هو الاستغلال، وعدم التقدير، الموضوع مش سهل إني أتخطاه بس بحاول أنفرد بنفسي، وابعد عن أي أشخاص في المجال بتحاول تستغلني وتستفاد مني، وكل اللي بحصده عدم تقدير ومفيش دعم كمان.
في رأيك... كيف يُمكن أن يتوفر للكاتب التوازن بين العزلة المُلهمة، وبين التفاعل والإحتكاك مع الطبيعة والحياة بشكل عام من جهة وأخرى من أجل الكتابة؟
بشوف إن الاحتكاك والتعرف على احوال الجميع واخبارهم والسماع ليهم ده بيدي مساحة كبيرة لفكر الكاتب وبيساعده في إلهامه طبعا، العزلة بتكون أفضل بعض الأحيان لأن الكاتب ساعتها بيكون بيستجمع أفكاره، وبيحدد طريقه إزاي.
هُناك تيار يرفض كتابة الروايات التي تحتوي على رومانسية، فما رأيك؟
دي أراء وبتختلف من محتوى ل محتوى والأسلوب كمان ازاي، أنا قرأت روايات أدب رومانسي واللي بيفصل بين الكاتب المتميز وأي حد تاني، هو اللي بيقدر يسرد لنا محتوى مختلف وهادف.
ما هو الشيء الذي يُلهم قلمك عادةً؟
بحب طريقة تفكيري وإني بقدر أخلق من أي حوار أو موضوع شيء ملهم وليه محتوى وده برأي الكتاب طبعًا عني، كمان بحس إن إلهامي من الماضي والذكريات، وده شيء بيساعدني جدًا.
ما هي صفات الكاتب الناجح من وجهة نظرك؟
إنه يكون مختلف ومتميز، مش واخد حد قدوة ليه وعايز يكون شبه، أهه طبعا لينا كُتاب بنحبهم، بس لازم يكون ليا طريق لوحدي، أصنع لنفسي مكانة خاصة بعيد عن التكرار والعادي، الكاتب المتميز قارئ جيد، ومفكر بارع، وحالم وواسع الخيال أيضًا.
حدثنا بالقليل عن إنجازاتك السابقة؟
حاصلة على أكثر من ١٥٠ شهادة تقدير وتم تكريمي من قبل، وليا اكتر من حوار صحفي، وليا كتابات كتير تم تنزليها على جوجل باسمي، وفوزت بمركز أول بقصص قصيرة ليا في أكتر من مكان وتم نشر قصص قصيرة إلكترونية من كتاباتي في اكتر من مكان، وكمان هيتم نشر أول كتاب مجمع قصصي إلكتروني خاص بيا على جريدة معروفة جدًا، وكمان بنجهز كتاب مجمع خواطر إلكتروني خاص ليا أنا وصديقة كاتبة فقط.
ماذا تُعني لكَ الكتابة؟ هل هي هواية أم شيء أساسي؟
زي ما قولت الكتابة هبة من عند ربنا، وأصبحت شيء أساسي في حياتي.
كلمتك الأخيرة مسك الختام.
أولا الحمد والشكر لله وبعد كدة أخويا محمد
وطبعا شكرًا لدعم أصدقائي ليا
وشكرًا ليكم كُتاب إيلاف على مساعدتكم ومجهوداتكم والحوار الجميل ده.
